hae kya pur-fareb sazish hai
shahr ka shahr nazr-e-atish hai

jam-e-jamshed zer-e-gardish hai
dekhte jaiye numaish hai

aam zulm-o-sitam ka charcha kyon
khas lutf-o-karam ki barish hai

puchhti hai zaban khanjar ki
kya abhi zindagi ki khwahish hai

khauf-o-dahshat ke sune jangal mein
sabr-o-himmat ki aazmaish hai

aql ke dushmanon ko kya kahiye
ilm ke makhzanon pe bandish hai

kya abhi sans le rahe ho 'zafar'
ji huzur aap ki nawazish hai