haft aflak se aage kahin kuchh ho to kahun had-e-idrak se aage kahin kuchh ho to kahun main ne jis zat ko labbaik kaha hai us ke jalwa-e-pak se aage kahin kuchh ho to kahun jis pe paiwand hi paiwand nazar aate the aisi poshak se aage kahin kuchh ho to kahun mujh se puchhe koi insan kahan tak pahuncha azm-e-bebak se aage kahin kuchh ho to kahun han meri zist ka hasil gham-e-dauran to nahin chashm-e-namnak se aage kahin kuchh ho to kahun jis taraf dekhiye virani hi virani hai khas-o-khashak se aage kahin kuchh ho to kahun har taraf ham-watanon khun-kharabe ke siwa chashm-e-saffak se aage kahin kuchh ho to kahun aalam-e-khak meri zat ka har zarra hai aalam-e-khak se aage kahin kuchh ho to kahun mere aflak se aage to faqat hun main hi mere aflak se aage kahin kuchh ho to kahun jaan ka hai apni jagah ek tasawwur 'rumi' jasad-e-khak se aage kahin kuchh ho to kahun