hai aage ek bayaban is babul ke ba'd
hamara koi nahin hai dil-e-malul ke ba'd

na jaane khud ko kahan chhod aaya raste mein
mujhe talash hai apni tere husul ke ba'd

safar hayat ka kab khatm hone wala hai
ki jab zamin na hui khatm arz-o-tul ke ba'd

tumhaari zat hi kya qaus mein ghire hindso
na kuchh usul se pahle na kuchh usul ke ba'd

firaq-o-wasl azab-o-sawab baatil-o-haq
nuzul sab ka hua hai mere nuzul ke ba'd