hai aarzu ki apna sarapa dikhai de
aaina dekhta hun ki chehra dikhai de

masruf is qadar the ki sawan guzar gaya
hasrat rahi ki abr barasta dikhai de

khamosh hun ki bolna tohmat hai is jagah
jab dekhna nahin hai to phir kya dikhai de

socha tha bas ki zehn mein taswir ban gai
ab aankh kah rahi hai ki chehra dikhai de

ab dhul ki bajae dhuan hai fazaon mein
khilqat pukarti hai ki sahra dikhai de

chehron ka rang zard hua dhup ki tarah
'shahid' kahin to abr ka tukda dikhai de