hai dhup tez koi saeban kaise ho
ye waqt hum pe bhala mehrban kaise ho

na lafz ho to koi dastan kaise ho
zaban kat li tum ne bayan kaise ho

hamare hisse mein do-gaz zamin bhi to nahin
hamare haq mein koi aasman kaise ho

ade rahenge agar apni zid pe donon fariq
to koi faisla bhi darmiyan kaise ho

ganwa na baithun kahin tujh ko aazmane mein
main dar rahi hun tera imtihan kaise ho

jo baat jhut hai sach kaise man lun us ko
batao dur ye wahm-o-guman kaise ho