hai dil hi faqat jigar nahin hai
shamshir to hai sipar nahin hai

khali hai sadaf guhar nahin hai
hai aankh magar nazar nahin hai

sar sar hai tera baghair sauda
sauda jo mila to sar nahin hai

aahen nahin tere dil ki aahen
jab in mein koi asar nahin hai

be-dana uge to khak se kuchh
dane mein agar shajar nahin hai

jine ko to khwahishen hain lakhon
marne ko jigar magar nahin hai

wo yas ki hai 'amin' shab-e-tar
jis shab ki koi sahar nahin hai