hai ghazal se tujh ko shaghaf agar sabhi masalon ko sukhan bana
gham-e-rozgar ki baat kar tu aziyyaton ko sukhan bana

kabhi mah-rukhon mein ulajh gaya kabhi khushbuon ke hisar mein
mere shauq-e-taba ne rae di tu na gesuon ko sukhan bana

kai zawiye hain sawal ke yahi ghaur karna hai ab tujhe
jahan masalon ke bhi hal milen unhin pahluon ko sukhan bana

tera shor-ghul wo sunenge kyon jo alam liye hain sukun ke
tujhe un se karni ho guftugu to khamoshiyon ko sukhan bana

kisi jaan-ba-lab ki bhi aah sun jo tadap ke tujh ko pukar le
kabhi dard-e-dil se khitab kar kabhi aansuon ko sukhan bana

koi tegh-o-neza uthae jab tu qalam se us ko jawab de
tu rafaqaton ki zaban rakh tu sadaqaton ko sukhan bana

ye hai raaz-e-azmat-e-shaeri tu samajh le ‘akhtar-e-hashmi’
ye jo lafz lafz hain wusaten inhin wusaton ko sukhan bana