hai husn ka eajaz ki eajaz-e-nazar kya
aankhon mein hain poshida tere lal-o-gohar kya

ashkon ke sitare kaji yaadon ke sharar hain
ab un ke siwa aur nahin sham-o-sahar kya

phir arsa-e-mahtab hai shab-khun ki kahani
kirnon ki sinanen hain ki hain tar-e-jigar kya

ye raat ye mahtab ye khushbu ye tarannum
aks-e-gham-e-jaanan bhi hai taskin asar kya

hum kis se kahen qissa-e-mahrumi-e-bulbul
dushman hai gulistan hi sara gul-e-tar kya

jis dard ka daman teri palkon se bandha ho
us dard ki ho sakti hai tadbir digar kya

har marhala-e-sakht mere shauq ki manzil
manzil pe pahunchna hai khatar kya hai hazar kya

phir dil pe barasti hai tere pyar ki shabnam
ab khauf-e-bad-andeshi-e-khurshed-e-sahar kya

ek dhund si chhai hai sar-e-jada-e-ummid
har gam pe laenge nai sham-e-nazar kya

tajdid-e-tamanna bhi hai wamandagi-e-shauq
phir qafila lutta hai sar-e-rahguzar kya

mahfil mein ye kaun aaya ki bujhne lagin shamen
lo sham se paida hue aasar-e-sahar kya