hai id lao mai-e-lala-fam uth uth kar
gale lagate hain shishon ko jam uth uth kar

hawa chali meri uftadgi ki ai saqi
girenge nashshe mein sab khush-khiram uth uth kar

zamin-o-arsh-o-falak paemal hote hain
na jao sahn se baala-e-baam uth uth kar

koi bashar na ho maghrur jism-e-khaki par
ki baithte hain bahut qasr-e-kham uth uth kar

dam-e-sahar nazar aaya hai kis ka munh yarab
sanam jo karte hain mujh ko salam uth uth kar

zara uthaiye tabut apne aashiq ka
khuda ki rah ka karte hain kaam uth uth kar

qayamat aai hai halchal hai aasmanon par
na phiriye bahr-e-khuda baam baam uth uth kar

pade hain panw ki surat zaban mein ghatte
ye qasidon ko diye hain payam uth uth kar

banegi shoala-e-jawwala gardish-e-qismat
tumhaare gird phirega ghulam uth uth kar

badhegi baat na baithenge chupke hum ai but
raqib se jo karoge kalam uth uth kar

rahegi aashiqon ke dast-o-pa mein jab tak his
tumhaari lenge balaen mudam uth uth kar

khuda bithae agar karbala mein mujh ko 'munir'
phirun main gird-e-mazar-e-imam uth uth kar