hai jo tasir si fughan mein abhi
log baqi hain kuchh jahan mein abhi

dil se uthta hai subh-o-sham dhuan
koi rahta hai is makan mein abhi

sath hai ek umr ka lekin
kashmakash si hai jism-o-jaan mein abhi

mar na rahiye to aur kya kije
jaan hai jism-e-na-tawan mein abhi

aur kuchh din kharab ho lije
sud apna hai is ziyan mein abhi

wo manazir meri nigah mein hain
jo nahin wahm mein guman mein abhi

nahin farigh zamin se 'anjum'
kaam baqi hai aasman mein abhi