hai nahin koi nakhuda dil ka
dil hi hai ek aasra dil ka

chaar-su be-khudi mein phirta hai
kuchh thikana nahin raha dil ka

rasm-e-duniya ko kyun ye manega
hai alag jag se qaeda dil ka

shekh-o-pandit ko koi samjhae
rab se rahta hai rabta dil ka

rah-e-insaniyat hi awwal hai
hai yaqinan ye falsafa dil ka

do-jahan bhi yahan sama jaen
kitna phaila hai daera dil ka

lab talak aa ke baat hi badli
kya kare lafz tarjuma dil ka

aql kab aaegi tumhein 'mona'
mante kyun ho tum kaha dil ka