teri nazar mein aalam meri nazar mein tu hai
ek dil ke hath mein ab ek dil ki aabru hai

fitrat ka rang le kar phirti jo chaar-su hai
ek be-gunah dil ki masum aarzu hai

pazhmurda gul chaman ka kaliyon se kah raha hai
phulon ki khush-numai ek raaz-e-rang-o-bu hai

jab had se badh gai kuchh har had meri khushi ki
main ne samajh liya ki ab khatm aarzu hai

honton ko ho na jumbish wo sab samajh rahe hon
ye shan-e-guftugu bhi ek shan-e-guftugu hai

mujh se suno junun aur bechaargi ka matlab
phulon ki chah karna kanton ki aarzu hai

kaun hai jo be-qarar hai tere baghair 'ashraf'
manzil ko dekh shayad ab teri justuju hai