hai wahi daur-e-sitam mashq-e-sitam aaj bhi hai
log zinda hain magar zist ka gham aaj bhi hai

kis ko fursat hai ki mazlum ke aansu ponchhe
wahi aansu hain wahi daman-e-nam aaj bhi hai

meherban kahiye use ya ki sitamgar kahiye
har sitam us ka ba-andaz-e-karam aaj bhi hai

khun-e-mazlum ki tarikh likhi hai jis se
hath mein mere wo bebak qalam aaj bhi hai

jaise milne hi ko hai saya-e-daman tera
na-umidi mein bhi ummid-e-karam aaj bhi hai

ab bhi manzil pe pahunchna nahin aasan 'payam'
rahguzaron mein wahi pech wo kham aaj bhi hai