hai zikr yahi har su ab umr-daraazon mein
khoi hui duniya hai ye shoabada-bazon mein

us lai se tarannum se main kaise bahal jaun
aawaz nahin baqi jab dil ke hi sazon mein

sajde hon numaish ke phir kaise asar hoga
malik pe duaon ka bande ki namazon mein

mayyat mein amiron ki ek jashn sa rahta hai
logon ki kami kyon hai ghoraba ke janazon mein

kah denge sar-e-mahshar aaza-e-badan 'anwar'
aamal khuda se sab kuchh hoga na raazon mein