hain bahut se aashiq-e-dil-gir jama
tere tarkash mein hain kitne tir jama

achchhi surat se hamein bhi ishq hai
karte hain taswir par taswir jama

kucha-e-qatil mein aafat aa gai
jab hue do chaar bhi rahgir jama

ya laga do aag ya likh do jawab
ho gaya hai daftar-e-tahrir jama

thodi thodi hi mile us dar ki khak
chutki chutki hum karen iksir jama

khun-e-dil ka chashm-e-tar theka na le
is se hone ki nahin taufir jama

kis tarah yakja hon 'dagh' apne aziz
hone deti hi nahin taqdir jama