hain hum bhi khub chah ka saman kiye hue
baithe hain ghar ko pahle hi viran kiye hue

dhoke mein aa ke bagh-e-jahan mein chale gae
dil mein guman-e-kucha-e-jaanan kiye hue

baitha hun roz-e-hijr mein har ek ghadi pe main
azm-e-shumar-e-reg-e-bayaban kiye hue

pas un ko rahwe apne jo namus-o-nang ka
hum bhi phirenge chaak gareban kiye hue

'arif' bata ki sar hai ye kis din ke waste
phirta hai aaj tegh wo uryan kiye hue