hain us ke samne ai 'shauq' kis shumar mein phul
khile hon jis ke kaf-e-pa se regzar mein phul

main ek khar hun lekin nasib dekho to
liye hain chaaron taraf se mujhe hisar mein phul

mila bhi kaam to aaraish-e-chaman ka mila
tamam umr rahe mere karobar mein phul

kabhi jo main ne manaya junun mein jashn-e-bahaar
piro liye hain gareban ke tar tar mein phul

mere lahu se hai rang-e-bahaar maqtal mein
lutae jate hain jashn-e-salib-o-dar mein phul

chaman ko de ke lahu 'shauq' main ne kya paya
na ikhtiyar mein kante na ikhtiyar mein phul