hairat-maab hun ki ye kya dekhta hun main
ai sahib-e-jamal tera aaina hun mein

rang-e-tilism-e-alam-e-taswir hai hayat
aur is nigar-khane mein gum ho chuka hun main

aankhon mein ek charagh-e-tamanna liye hue
tarikiyon ke shahr mein kya dhundhta hun main

aatish-mizaj tha wo so ab khak ho chuka
main khaksar tha so numu pa raha hun main

fikr-e-rasa mein umr meri sarf ho gai
ab sochne laga hun bahut sochta hun main