ham-safar yaad hain us ke jo safar khatm hua
jaane kab kaun si sazish ho ye dar khatm hua

be-sabab sab ko hi sabqat ke junun ne mara
aise bikhre hain ki rishton ka asar khatm hua

eatibar uthte hi ye kaisa taghayyur aaya
dil ka viran makan rah gaya ghar khatm hua

shakh hi shakh ki dushman thi samar kya deta
phulne-phalne se pahle hi shajar khatm hua

jaanta tha ki mere git bhi kho jaenge
tera mujh se jo talluq tha agar khatm hua

hum to mail the ba-har-haal lahu dene par
ek teri tarz-e-taghaful se jigar khatm hua

us ko bas mujh ko dubone hi ki zid thi shayad
main jo duba to mere sath bhanwar khatm hua