hamara din kabhi yun bhi shafaq anjam ho jae parinde jhil par qabza karen aur sham ho jae kisi ka zikr chhedun istiaron mein kinayon mein koi samjhe to shayad do ghadi kohram ho jae tajjub hai agar har naqsh mauzu-e-sukhan thahre tajjub hai agar be-chehragi ilzam ho jae hamare baad mumkin hai sukhan takmil tak pahunche hamare baad mumkin hai mohabbat aam ho jae rag-e-jaan khinchti hai phir koi mithi kasak 'talib' aur aise mein agar ek sans bhi nakaam ho jae