hamein bhi kaam bahut hai khazane se us ke
zara ye log to utthen sirhane se us ke

yahi na ho ki tawajjoh hata le wo apni
ziyaada der na bachna nishane se us ke

wo mujh se taza mohabbat pe raazi hai lekin
usul ab bhi wahi hain purane se us ke

wo tir itni riayat kabhi nahin deta
ye zakhm lagta nahin hai gharane se us ke

wo chadh raha tha judai ki sidhiyan 'khurram'
sarak raha tha mera hath shane se us ke