khauf ki aisi na bimari lage
sach wo bole to adakari lage

sahibon se har ijazat lo magar
muskurana bhi na sarkari lage

sab miyan haalat par mauquf hai
phul bhi talwar se bhaari lage

ai farishto sar na dhalkana mera
maut bhi aae to sardari lage

bhad mein jae ye tahzib-e-kalam
baat kahne mein bhi dushwari lage

wo ghazal-abaad mein rahta hai nur
kyun na us ka har sukhan kari lage