hamein ye raaz sabhi ko batana hota hai
nae ke ba'd hi koi purana hota hai

bila-jawaz nahin bolta hun der talak
ki main ne baat ko aage badhana hota hai

yunhi nahin meri aankhon mein ashk lahraate
ki har kisi ne mera dil dukhana hota hai

ye munsifin kisi ko bhi haq nahin dete
khuda ka faisla hi munsifana hota hai

ye dasht wale miyan hijr gungunate hain
har ek khitte ka qaumi tarana hota hai

kisi ko de di hai tohfe mein yusufi ki kitab
ki hum ne kaunsa ab muskurana hota hai

hamari baat wagarna koi nahin sunta
lihaza shor to hum ne machana hota hai