har aan us sitam-ijad ki ada hai aur
ki din ko aur hai shab ko wo dilruba hai aur

abas ye khuld ki targhib mujh ko hai waiz
khuda-parasti se apna to muddaa hai aur

mile jo hur ka bosa to main na lun waiz
ki chumne mein kisi ke qadam maza hai aur

ye dam-ba-dam hai fuzun shauq-e-talib-e-didar
jawab-e-saf pe bhi arz-e-iltija hai aur

ye himmat-e-dil-e-ashiq hai dad ke qabil
tumhaare jaur pe bhi mail-e-wafa hai aur

pila diye mujhe saqi ne khum pe khum 'sabir'
magar wo tishna-dahan hun meri sada hai aur