har barahman but har ek muslim khuda le jaega
mere dar se har mariz apni dawa le jaega

khud mujhe aana hai tere pas ya burda tera
mere pas aaega aur mujh ko utha le jaega

main had-e-fasil tak aa pahuncha jo shauq-e-wasl mein
wo had-e-fasil ko aur aage badha le jaega

mujh ko jaane kis taraf se la raha hai rasta
mujh ko jaane kis taraf ye rasta le jaega

apne ghar ke sare darwaze khule rakhta hun main
juz mere is ghar se koi chor kya le jaega

aaina-bini ke baad 'akash' aankhon ko sambhaal
ek bhi aansu agar tapka baha le jaega