har ek chiz mayassar siwae bosa hai
aur apne gham ka sabab iltawa-e-bosa hai

bhale to lagte hain inkar-e-bosa par bhi ye hont
kabhi to ye kaho ye lab barae bosa hai

mere qarib se honton ko mat guzar itna
ki chal rahi mere sar mein hawa-e-bosa hai

chhupaya kar nahin honton ko muskuraate hue
ye ja-e-sharm nahin hai ye ja-e-bosa hai

lab-e-khamosh pe bhi hai mere hi kaam ka harf
meri murad ye bhi hai jo pa-e-bosa hai

samajh mein kuchh nahin aata ki bolti ho kya
labon pe khelti phirti nida-e-bosa hai

yahi na chhod ke ja tishna-kaam honton par
ki ye to bosa-e-sahw-e-qaza-e-bosa hai

tumhaari khush-dahni se hai asl mein sarokar
ye lab ka bosa to bas ibtida-e-bosa hai

bas ek bosa-e-subh aur ek bosa-e-sham!
faqir-e-bosa hun aur iltija-e-bosa hai

laban-e-bosa-chashida bhi khub hain lekin
nigah mein ek but-e-nakhuda-e-bosa hai