har ek hazar mein bas panch sat hain hum log
nisab-e-ishq pe wajib zakat hain hum log

dabao mein bhi jamaat kabhi nahin badli
shurua din se mohabbat ke sath hain hum log

jo sikhni ho zaban-e-sukut bismillah
khamoshiyon ki mukammal lughat hain hum log

kahaniyon ke wo kirdar jo likhe na gae
khabar se hazf-shuda waqiat hain hum log

ye intizar hamein dekh kar banaya gaya
zuhur-e-hijr se pahle ki baat hain hum log

kisi ko rasta de den kisi ko pani na den
kahin pe nil kahin par furaat hain hum log

hamein jala ke koi shab guzar sakta hai
sadak pe bikhre hue kaghzat hain hum log