har ghadi aafiyat har ghadi shukriya
hasil-e-zindagi aagahi shukriya

mujh ko mar kar bhi ek zindagi mil gai
doston ko dua shaeri shukriya

ghar ki diwar baaten samajhne lagi
ab zarurat nahin aap ki shukriya

fikr-e-duniya-o-din ab na uljha mujhe
aakhiri darguzar aakhiri shukriya

dar muqaffal hue chilmanen gir gain
ek khidki khuli rah gai shukriya

ho chala hai yaqin gulsitan hai mera
phul khushbu saba chandni shukriya

dhund laya hun 'iqrar' patal se
ek qaus-e-quzah raushni shukriya