jab samundar ki us ne khwahish ki
meri aankhon ne khub barish ki

aap hain kis liye pasheman se
main ne zakhmon ki kab numaish ki

ek ek harf par dhari ungli
kya meri aap ne sataish ki

ek makan wo jise na dekha tha
umr-bhar us mein hi rihaish ki

kaise murda-zamir logon mein
zinda rahne ki hum ne koshish ki

hum ne to kuchh nahin kiya lekin
aap ne kya kiya jo sazish ki

khud ko jab chaak par dhara 'iqrar'
phir zamanon ke gird gardish ki