har ghadi har waqt hi bazar mein rahna pada
bechna tha khud ko so akhbar mein rahna pada

ek hi tahrir ko pani pe likkha bar bar
rahna tha bas is liye sansar mein rahna pada

khwahishen to thin ki hum buniyaad ka patthar banen
hae kaisa jurm tha diwar mein rahna pada

phir kisi se dosti us ne na mere baad ki
umr bhar mujh ko bhi phir aghyar mein rahna pada

wo jo tha khushbu ki manind udna jis ka shauq tha
bebasi dekho use ashaar mein rahna pada

hum tasawwur kar na pae 'wahid' us taswir ka
raat bhar hum ko khayal-e-yar mein rahna pada