har khauf har khatar se guzarna bhi sikhiye
jina hai gar aziz to marna bhi sikhiye

ye kya ki dub kar hi mile sahil-e-najat
sailab-e-khun se par utarna bhi sikhiye

aisa na ho ki khwab hi rah jae zindagi
jo dil mein thaniye use karna bhi sikhiye

bigde bahut kashakash-e-naz-o-niyaz mein
ab us ki anjuman mein sanwarna bhi sikhiye

hota hai pastiyon ke muqaddar mein bhi uruj
ek mauj-e-tah-nashin ka ubharna bhi sikhiye

auron ki sard-mehri ka shikwa baja 'sahar'
khud apne dil ko pyar se bharna bhi sikhiye