har kisi dar pe kahan sajda rawa rakhte hain
hum muwahhid hain faqat ek khuda rakhte hain

wo kadi dhup mein rahmat ki ghata rakhte hain
sar pe man bap ki jo log dua rakhte hain

dagh daman pe nahin naqsh-e-wafa rakhte hain
hum muhibban-e-watan ujli qaba rakhte hain

zakhm jo tu ne diya dil mein saja rakhte hain
lazzat-e-karb ke nakhun se hara rakhte hain

tum to phir apne ho apnon se adawat kaisi
hum to dushman pe bhi darwaza khula rakhte hain

jagmaga uthta hai tarik muqaddar un ka
khun apna jo charaghon mein bhara rakhte hain