jo bhi aaya hai yahan ho ke hi sarshaar utha
sab ka aangan hai na tu bich mein diwar utha

masala aur ulajhta hai ghalat-fahmi se
pahle tu baat to kar baad mein talwar utha

dil bhi raushan ho teri aankhon mein nur aa jae
jazba sadiq hai to ek aisa hi minar utha

surkh-ru aur bhi hoti gai maqtal ki zamin
sar hamara bhi kuchh is tarah sar-e-dar utha

tez-tar ho gae jab gardish-e-dauran ke qadam
hath mein jam liye jhum ke mai-khwar utha

zulm jab had se badha hath mein kirpan liye
apne 'nashtar' ki tarah kaun ye sardar utha