har lahza makin dil mein teri yaad rahegi
basti ye ujadne pe bhi aabaad rahegi

hai hasti-e-ashiq ka bas itna hi fasana
barbaad thi barbaad hai barbaad rahegi

hai ishq wo nemat jo kharidi nahin jati
ye shai hai khuda-dad khuda-dad rahegi

wo aae bhi to zabt se lab hil na sakenge
fariyaad meri tishna-e-fariyaad rahegi

ye husn-e-sitam-kosh sitam-kosh hai kab tak
kab tak ye nazar bani-e-bedad rahegi

wo zulf-e-pareshan ka sanware na sanwarna
wo un ke bigadne ki ada yaad rahegi