har mushkil aasan banane wala tha
main patthar ke pan banane wala tha

khwabon ki tawil samajh se bahar thi
jab main pakistan banane wala tha

haq bahu haq bahu kah kar ek faqir
bahu ko sultan banane wala tha

mujh aisa bahlol kahan se laoge
nar se jo naran banane wala tha

shahzadi ne jis ki khatir zahr piya
ek dehati nan banane wala tha

aap ne mera hath na thama hota to
main khud ko shaitan banane wala tha

darwazon ki sakh bachane ki khatir
diwaron ke kan banane wala tha

aap ki ek ek baat ghazal mein dhaal ke main
aan ki aan mein tan banane wala tha