har parinde ki baat sunta hai
be-zaban ped sab se achchha hai

jis qadar hum ne bhed samjha hai
koi manzil na koi rasta hai

in andheron ko kis liye kosen
raushni ban ke phul khilta hai

chalne wala nikal gaya aage
qafila raste mein thahra hai

jis ki khatir hain jagte rahe hum
wo abhi palne mein sota hai

in dinon main hun tanha tanha sa
ek gum-sum khayal rahta hai

be-gharon ke qadam nahin rukte
un ka aangan tamam duniya hai

dil bahalta hujum mein rah kar
khud se darta hua wo tanha hai

kal ki baaton se be-khabar hum hain
sat janmon ka kya bharosa hai