har roz hi karte hain kaghaz pe ye fan zinda
hum ahl-e-sukhan hain hum rakhte hain sukhan zinda

jo haar gae himmat raste mein pade hain wo
pahunche wo hi manzil par thi jin mein lagan zinda

murda nahin kahte hain shaida-e-mohabbat ko
zinda hain wo zinda hain wo zer-e-kafan zinda

khushbu ki tawaqqo hai be-kar hi baghon se
baghon mein nahin milte wo sarw saman zinda

ehsas-e-masarrat ko hum marne nahin dete
ummid ki rakhti hai hum ko to kiran zinda

sayyaad bata kis par ab zulm tu dhaega
chhode hi kahan tu ne murghan-e-chaman zinda

ye kis ne kaha apni tarikh se ghafil hain
zehnon mein hamare hai rudad-e-kuhan zinda

jo jaan lutate hain sarhad ki hifazat mein
aise hi jawanon se rahta hai watan zinda

daulat ka pujari tha daulat ke liye dekho
shoalon ke hawale ki zalim ne dulhan zinda

jab sair-e-bahaaran ko aata hai 'qamar' koi
ek nim tabassum se hota hai chaman zinda