har sadi mein qissa-e-mansur dohraya gaya
sach kaha jis ne use suli pe latkaya gaya

hum pe hi sadiyon se hain zulm-o-sitam jabr-o-alam
aur hamein hi morid-e-ilzam thahraya gaya

har zamane mein milega ek sadaqat ka naqib
har zamane mein use hi tauq pahnaya gaya

rukh badal kar aandhiyan haalat ki uthti rahin
azm mein mere na koi farq bhi paya gaya

kya sunaen hum shikast-e-dil ka afsana 'jamal'
ye wo shisha hai jo har patthar se takraya gaya