har shakhs isi khayal mein hai
ye shahr bhi yarghamal mein hai

kya jaaniye fikr kya lagi hai
kya hashiya-e-khayal mein hai

mumkin hai uruj ho mayassar
duniya to abhi zawal mein hai

takhliq ka la-zawal lamha
lafzon ke hasin jal mein hai

tahrir har ek phiki phiki
har mu-e-qalam zawal mein hai

be-misl rafaqaton ki khushbu
aaina-e-mah-o-sal mein hai

lahja hi badal gaya hai us ka
talkhi si har ek sawal mein hai