har zaban mein har zaban par ek hi afsana hai
kuchh to hai jo sara aalam aap ka diwana hai

mubtala wo khud bhi hai jo zahiran begana hai
jis ka gham ahl-e-nazar ki ishrat-e-mastana hai

eatibar-e-ma-siwa is raaz se begana hai
ranj-e-furqat iztirab-e-husn ka harjaana hai

bais-e-tauq-e-asiri dam hai ya dana hai
us se puchha chahiye jo hosh ka diwana hai

qais duniya ki nazar mein aaj bhi diwana hai
naz-bardari ka kitna mukhtasar afsana hai

aastan-bosi ki lazzat aswad-e-kaba se puchh
sang samjha hai jise tu aariz-e-jaanana hai

aap hi ki yaad se dil shad hai aabaad hai
aap jis dil mein nahin wo dil nahin virana hai

saqiya is bazm-e-fani mein wahi hai khush-nasib
ru-ba-ru jis ke subu hai hath mein paimana hai