hargiz na rah pai farda-o-di ne dil par
rahti hai ek haalat barah mahine dil par

sakte mein hain mah-o-mehr dariya pade hain be-bahr
hai sakht ghair-mauzun duniya zamin-e-dil par

shoala charagh mein hai sauda dimagh mein hai
sabit qadam hun ab tak din-e-mubin-e-dil par

ya-ayyohal-majazib hai bas-ki zer-e-tartib
majmuatul-fatawa qaul-e-matin-e-dil par

likh lo ye meri rae kya kya sitam na dhae
kal dil ne aadmi par aaj aadmi ne dil par

ye ranj na-kashida ye jeb na-darida
ai ishq rahm han rahm in tarkin-e-dil par

mano ye ghar na chhodo duniya ko dekhte ho
jo kuchh guzar chuki hai is na-makin-e-dil par

ek sar hai na-kashuda ek qaul na-shanuda
ek naghma na-saruda tarz-e-nawin-e-dil par

padta hai jasta jasta maddham sa aur shikasta
ek mah-e-nilmin ka partaw nagin-e-dil par

sau bar idhar se guzra wo aatishin chaman sa
ek barg-e-gul na rakkha dast-e-yamin-e-dil par

khun-basta chashm-e-hairan paiwasta lan-gardan
be-did balki be-dard balki kamine dil par

tufan utha rakha tha aankhon ne wah-wa ka
us ki nazar nahin thi kal aafrin-e-dil par

rangin to bahut hai duniya magar mahashay
dhabbe se pad gae hain kuchh aastin-e-dil par

wo mah-e-naznin hai ya sarw-atishin hai
ya fitna-e-qayamat barpa zamin-e-dil par

sab na-malamaton ko sab be-karamaton ko
sab sar-salamaton ko lana hai din-e-dil par

'jawed' ko dikha kar kahta hai sab se dilbar
udham macha rakha tha in bhai-ji ne dil par

faruqi aur ahmad-mushtaq ko tahayyat
shakh-e-ghamgin-e-dil par hisn-e-hasin-e-dil par