hasin khwab safar ke dikha gaya hai kaun
badan mein aag si yaro laga gaya hai kaun

udas raat mein tare ubhar ke dub gae
ye aaj bazm-e-tarab se chala gaya hai kaun

padi hui thi jo banjar zamin muddat se
hunar ke ped ye us mein uga gaya hai kaun

na ab ke mausam-e-gul ka bhi inkishaf hua
diye jala ke ye aankhen bujha gaya hai kaun

dil-o-nazar ke karishme na dekhte 'wijdan'
talab ye ishq ki dil mein badha gaya hai kaun