hasraten aa aa ke jama ho rahi hain dil ke pas
karwan goya pahunchne wala hai manzil ke pas

bich mein jab tak thin maujen un mein shorish thi bahut
intishaar un mein hua jab aa gain sahil ke pas

nazr-e-qatil jaan jab kar di to baqi kya raha
ab tadapne ke alawa hai hi kya bismil ke pas

gharq kar den meri kashti phir ye maujen dekhna
hashr tak patka karengi apna sar sahil ke pas

bhik dena to kuja kasa bhi us ne le liya
main ab ek hasrat-zada hun kya hai mujh sail ke pas

ek hum hain hum ne kashti dal di gardab mein
ek tum ho darte ho aate hue sahil ke pas

khair ho 'ajiz' kahin aisa na ho dil dub jae
ishq ke dariya mein halchal ho rahi hai dil ke pas