hasti ko meri masti-e-paimana bana de
ai be-khabari hasil-e-mai-khana bana de

talib hun main us ek nigah-e-do-asar ka
jo hosh mein la kar mujhe diwana bana de

ai barhaman ek din but-e-pindar ko apne
tod aur charagh-e-dar-e-but-khana bana de

kah do ki bahaar aae to be-kar na baithe
diwana bane ya mujhe diwana bana de

diwangi-e-ishq badi chiz hai 'simab'
ye us ka karam hai jise diwana bana de