hasti ko teri bas hai miyan gul ki ishaarat
kafi hai mere nale ko bulbul ki ishaarat

fatwa talab ai yar na qazi se karun main
tauba-shikani ko hai meri mul ki ishaarat

mil baith meri aankhon mein hai saat-e-nek aaj
ye chashm taraazu hain tere tul ki ishaarat

hai bais-e-jamiyyat-e-dil ek jahan ki
ai shokh pareshani-e-kakul ki ishaarat

taqwa ke nahin bar se qad kham tera ai shaikh
ek khalq mein mashhur hai is pul ki ishaarat

yaad aae teri zulf na mujh ko jo chaman mein
de tab mere dil ko na sumbul ki ishaarat

ushshaq ko tujh chashm ke hajat nahin mai ki
behosh kare 'sauda' ko qulqul ki ishaarat