hata ke mez se ek roz aaina main ne
phir apne-ap se rakkha na wasta main ne

jab apne-ap se pahchan apni kho ke mili
to khud hi kat diya apna rasta main ne

main kam-sini mein bhi gudiya kabhi nahin kheli
palon mein tai kiya barson ka fasla main ne

charagh hun mujhe jab dhup ras aa na saki
to khud sikod liya apna daera main ne

main apne aap mein hun ya nahin, kabhi apna
kisi ko thik bataya nahin pata main ne

ajib kya jo bikhera nahin samet ke phir
tamam umr umidon ka silsila main ne