hath hamare sab se unche hathon hi se gila bhi hai
ghar aise ko saunp diya jo aag bhi hai aur hawa bhi hai

apni ana ka jal kisi din pagal-pan mein todunga
apni ana ke jal ko main ne pagal-pan mein buna bhi hai

diye ke jalne aur bujhne ka bhed samajh mein aae to kya
isi hawa se jal bhi raha tha isi hawa se bujha bhi hai

raushniyon pe panw jama ke chalna hum ko aaya nahin
waise dar-e-khurshid to hum par gahe gahe khula bhi hai

dard ki jhil-mil raushniyon se bara khwab ki duri par
hum ne dekhi ek dhanak jo shoala bhi hai sada bhi hai

tez hawa ke sath chala hai zard musafir mausam ka
os ne daman tham liya to pal-do-pal ko ruka bhi hai

sahil jaisi umar mein hum se sagar ne ek baat na ki
lahron ne to jaane kya kya kaha bhi hai aur suna bhi hai

ishq to ek ilzam hai us ka wasl ka to bas nam hua
wo aaya tha qatil ban ke qatl hi kar ke gaya bhi hai