hatheliyon pe liye apne sar gae hain log
safar pe ab ki ba-rang-e-digar gae hain log

tere sitam ka gila yun bhi kar gae hain log
ki aur kuchh na chala bas to mar gae hain log

dilon ke tera gharon par tere jamal ki dhup
jo aa padi hai to kya kya sanwar gae hain log

hua hai yun bhi ki apni talab ke sahra mein
misal-e-mauja-e-ju-e-safar gae hain log

badhi hai tishna-labi zindagi ki jab had se
to apni zat ke saghar mein bhar gae hain log

dilon mein suraten kya kya hain khauf-e-pinhan ki
badha hai apna hi saya to dar gae hain log

ude hain rah-guzaron mein gard-e-jaan ban ke
safar ke ishq mein kya kya na kar gae hain log

ufuq gawah rahe qatl-e-aftab ke baad
shafaq luti hai to phir apne ghar gae hain log

ye sail-e-khwab tha ya khwab-e-sail tha kya tha
ki chadh ke surat-e-dariya utar gae hain log

ab un ke laut na sakne ka gham tujhe kyun ho
ki su-e-dar tere hukm par gae hain log

na koi saya na aahat ye hashr kaisa hai
kahan chhupi hain sadaen kidhar gae hain log

sulag uthega har ek dar hawa ke chalte hi
qafas mein surat-e-raqs-e-sharar gae hain log

main khud gaya to khula sara shahr qaid mein tha
khabar ye thi ki bahut mukhtasar gae hain log

kahin pe kuchh to hua hai ki aaj zindan mein
gae hain aur bahut be-khatar gae hain log

tulu-e-mehr ko ab kaun rok sakta hai
gharon mein ham-rah-e-najm-e-sahar gae hain log