ishq se kaise baz aaen hum ishq to apna dharm hua
jis din ishq se nata tuta samjho kirya-karm hua

phir yaaden ghir ghir kar aain phir sulge ban zakhmon ke
phir bundon ne aag lagai phir sawan sargarm hua

rup to us ko aisa dete duniya dekhti lekin hum
but-sazi hi chhod chuke the jab wo patthar narm hua

kaise tesha-o-tegh banate kaise zarb lagate log
hathkadiyan thin sab ke hathon mein jab loha garm hua

hum shab-zinda-daron ki binai bhi thi sharminda
dekh ke apna chehra suraj aap bahut be-sharm hua