hawa-e-be-taraf-o-fasl-e-be-samar guzri
tere baghair guzarna hi kya magar guzri

sharik-e-shorish-e-duniya hun aur sochta hun
ki sham-e-bazm-e-tarab se bhi chashm-e-tar guzri

na thi pahad se kuchh kam magar musibat-e-umr
tere khayal mein guzri to mukhtasar guzri

koi bhi kaam na aaya shikasta-baali mein
saba bhi shakh-e-nasheman ko kat kar guzri

meri nigah ne khwabon mein khud ko pahchana
ki jagte mein jo guzri wo be-basar guzri

zamane-bhar se alag ho ke main udhar ko chala
jidhar jidhar se mere dil ki rahguzar guzri